Imbutaktak ni dati Albuera, Leyte ken Ozamiz City Police Chief Col. Jovie Espenido nga adda ti quota ken reward system iti Philippine National Police iti sidong ti war on drugs ti administrasion ni dati a Presidente Rodrigo Duterte.
Iti testimonia ni Espenido iti House Quad Committee , pinasingkedanna a nangipaulog ti liderato iti quota a limapulo agingga iti sangagasut nga indibidual nga agkatok kadagiti pagtaengan dagiti mapapati nga agus-usar ken aglaklako iti illegal a droga.
Segun kenni Espenido, kayatna nga ipatungpal ti war on drugs nga awan ti natay ken ti mision ket sumuko dagiti drug suspects ken dumalan ti rehabilitation isu nga awan ti nairekord iti panangidaulo na idiay Albuera ken Bacolod.
Innayonna pay nga adda 20,000 pesos a gunggona para iti tunggal indibidual a napapatay iti drug war ken aggapu ti pondo kadagiti Small-Town Lottery wenno jueteng lords a mangmangted iti kuarta kadagiti police regional commanders ken provincial commanders.
Inbingay pay ni Espenido a pinaayaban idi ni PNP Chief Ronald “Bato” Dela Rosa isuna tapno maidestino iti Ozamiz City kas hepe gapu iti kinaturedna.
Ti instruksion ni Dela Rosa ket ti panangparmek kadagiti sindikato ti illegal a droga a pakairamanan ti grupo ti Parojinog a naaramat dagiti balikas a “neutralize” ken “eliminate” uray ania ti pamay-an wenno by all means.
Kinuna pay ni Espenido, a direkta nga agrepreport isuna ken ni General Bato ken Presidente Rodrigo Duterte.
