Tumulong ti Philippine National Police iti Department of Education iti panangsimpa para iti school safety protocols kalpasan a naitantan ti nationwide simultaneous launching a nakatuding kuma idi kalman, Agosto 25.
Segun ken ni PNP chief Gen. Jose Melencio C. Nartatez Jr., nakibinnulig dagiti lokal a pulis kadagiti school division head ken regional director tapno maammuan dagiti kasapulan a panagbaliw iti drills.
Pinasingkedan ni Nartatez a masapul a mapapigsa ti training ti kinasagana dagiti pagadalan bayat a masalwadan ti kinatalged dagiti estudyante ken mangisursuro.
Naitantan ti drills gapu ti saan a nasayaat a paniempo ken buteng dagiti sumagmamano a grupo mainaig iti panagisayangkat ti active shooter drills.
Kiniddaw da a maitunos daytoy iti psychosocial ken child protection measures.
Segun iti DepEd, maaramat ti postponement tapno masigurado a ti drills ket age-appropriate ken trauma-informed, kasta pay a maprotektaran ti physical ken psychological well-being dagiti estudyante.
