Impaganetget ti Philippine National Police (PNP) a saanda a nagikkat ti security escorts ni Senador Ronald Bato dela Rosa.
Segun ken ni PNP Spokesperson Police Brig. Gen. Jean Fajardo, paset ti maipatpatungpal a Commission on Elections resolution No. 11067 iti panang-recall ti security personnel dagiti government official ken elected official iti intero a pagilian.
Malaksid ti dua a security detail a naikkat iti senador ket adda pay nabatbati nga uppat a protective security personnel a nakadeploy nga agpapada a naaprubaran ti certificate of authority wenno exemption manipod COMELEC nga agtalinaed agingga June 11, 2025.
Nakalanad iti resolusyon a dua laeng a security personnel iti rumbeng a maideploy malaksid laeng nu adda sangsangwen a pangta iti biag kas maibasar ti naisayangkat a threat assessment ken pangngeddeng ti poll body.
