Nainget itan ti panagbantay ti Philippine National Police kontra iti panaggatang ti botos iti intero a pagilian, dua nga aldaw sakbay ti eleksyon.
Segun ken ni PNP Chief PGen. Rommel Francisco Marbil, binilinnan dagiti regional director ken field commander a pabilgen ti kampanya kontra vote buying kas sungbat iti panawagan ni Presidente Ferdinand Marcos Jr ken iti pammilin ti Commission on Elections para iti nadalus ken napudno nga eleksyon.
Innayon ni Marbil nga ipatpatungpal ita ti PNP ti naag-agresibo nga operasyon nangruna ta agdinamag ti panaggatangan iti botos kadagiti sumagmamano a probinsia.
Ballaag ti PNP a madusa iti salinong ti linteg ti asino man a mapaneknekan a karaman iti vote buying ken selling.
Al-allukoyenda pay ti publiko a dagus nga ireport dagiti kastoy a pasamak iti kuerpo ti kapulisan wenno iti hotline ti COMELEC.
