Mangisayangkat ti Philippine National Police (PNP) iti “verification” ken “physical accounting” kadagiti paltog dagiti nasurok a 2,000 a type 5-gun owners ditoy pagilian, kas panagsagana iti masungad a National and Local Elections inton May 2025.
Segun ken ni PNP spokesperson Brig. Gen. Jean Fajardo, ti Civil Security Group (CSG) ti mangidaulo iti verification dagiti armas.
Daytoy ket kas panangsurot iti RA No. 10591 wenno Comprehensive Firearms and Ammunition Regulation Act a panggepna a siguraduen ti urnos ken kinatalged ti publiko bayat ti eleksion.
Ti type 5 license ket maitited kadagiti indibidual a mapalubosan nga agtagikua iti nasurok sangapulo ket lima 15 a paltog.
Inlawlawag ni Fajardo a mangipatulod ti Civil Security Group iti surat kadagiti agtagikua iti paltog sakbay ti inspeksion, ken kinunana pay a naiduma daytoy iti “Oplan Katok” a mangipamaysa iti expired a lisensia ti paltog.
Mabalin met a sumango iti administrative sanction dagiti makinkua iti paltog nga aglabsing iti pagannurotan.
Dagiti posible a panaglabsing ket pakairaman ti saan a panagpada ti address iti lisensia ken saan a natalged a panagidulin kadagiti paltog.
