Rinugianen ita nga aldaw ni Philippine National Police Chief PGen. Nicolas Torre III ti boxing training-na kas panangawat iti karit kenkuana ni Davao City Mayor Sebastian ‘Baste’ Duterte.
Segun ken ni Torre, napasnek ti panangawatna iti karit para iti fund raising event tapno matulongan dagiti agindeg a nalayus kadagiti napan a lawas.
Numan pay adda dagiti nangted tulong para iti panangsapul iti venue, kinumpirmaran ni Torre a nakasaganan ti Rizal Coliseum a pakaisayangkatan ti boxing match da ken ni Mayor Baste inton umay a lawas.
Awan pay met ti pormal a sungbat ni Mayor Baste no matuloy ti laban kontra ken ni Torre.
Inlawlawagna met a saan daytoy a panangpatol no di ket gundaway a mabalin a maaramat tapno makaur-or iti pondo tapno matulongan dagiti nadidigra ti bagyo.
