Nasurok 30% a sakupen ti sangagasut nga ektarya iti daga ti namulaanen babaen ti drone seeding iti ili ti Bantay.
Iti pannaki-uman ti Bombo Radyo Vigan ken ni Jordan Briones manipod Municipal Agriculture Office – Bantay, ti panang-pilot ti drone seeder kas rice farming ti Department of Agriculture iti nasao nga ili ket isu pay laeng iti nakaisayangkatanna iti intero a Rehiyon Uno idiay Barangay Malingeb ken Barangay Capangdanan, Bantay, Ilocos Sur.
Segun ken ni Briones, dagiti lugar a sakupen dagiti namulaan ken mamulaanto pay laeng ket nakolekta a naipasa idiay Region 1 ket aniaman a magastos ket ti ahensya ti mangbayad babaen ti voucher.
Impaganetgetna a dakkel a tulong para kadagiti mannalon ti nasao a drone seeding ta saan laeng a makalaka para ti labor nu diketdi saanda payen a marigatan iti panagtalon pay.
Ti drone seeding ket isu ti agiwaras ti bin-i ket mabalin a maaramat para iti panagabono ken panag-spray iti pesticides.
Manamnama a maituloyto ti drone seeding inton May 30, 2025 ken agtultuloyto agingga malpas iti panagmula.
