Agbalin a sentro ti napapateg a taripnong ti rehiyon iti Pilipinas iti panag-host iti Association of Southeast Asian Nations (ASEAN) Foreign Ministers’ Meeting ken panagrambak iti maika-limapulo nga anibersaryo ti Treaty of Amity and Cooperation in Southeast Asia manipod July 18 agingga 24.
Segun ken ni DFA Spokesperson for ASEAN Affairs Dax Imperial, manamnama a dumar-ay ti amin a foreign minister a kameng ti ASEAN, malaksid iti Myanmar a ti mangibagi ket permanent secretary.
Malaksid kadagiti pagilian a miembro ti ASEAN, manamnama a makipaset kadagiti taripnong dagiti foreign minister iti Australia, New Zealand, India, Japan ken European Union.
Karaman kadagiti kangrunaan nga aktibidad ti maysa nga informal consultation maipanggep iti pannakaipatungpal ti Five-Point Consensus idiay Myanmar, ti ASEAN Foreign Ministers’ Meeting-Post Ministerial Conferences karamanen dagiti dialogue partner, ASEAN Plus Three a bukbuklen iti China, Japan ken South Korea ken nangat-ngato a lebel iti panagtaripnong ti ASEAN Regional Forum.
Kabayatanna, kinuna ni Imperial nga ur-urayen pay laeng ti DFA ti pinal a kumpirmaston iti dadduma pay a foreign ministers ken nangangato nga opisyal a dumar-ay iti agsasaruno a taripnong iti pagilian.
