Nairekord ti Philippine Institute of Volcanology and Seismology (PHIVOLCS) ti umuna a tsunami waves iti innem a lugar idiay Mindanao kasaruno ti magnitude 7.8 a ginggined idiay Sarangani itattay.
Segun ti Phivolcs, immuna a naobserbaran dagiti dalluyon idiay Maasim, Sarangani itay 7:42 iti bigat, simmaruno idiay Kiamba itay 7:44 iti bigat ken Kalamsig itay 7:59 iti bigat.
Kasta pay iti dalluyon idiay Mati City itay 8:19AM, Zamboanga City itay 8:32AM ken Tandag City itay 8:45AM.
Maibasar iti listaan manipod kadagiti sea-level monitoring station, umabot iti nasurok-kumurang 1.4 a metro iti kangatoan a nairekord iti kangato ti tsunami wave.
Maipalagip a nangiruar ti Phivolcs ti tsunami warning kalpasan ti napigsa a ginggined itay 7:37 iti bigat.
Pinasingkedan dagiti state seismologist nga agtultuloy iti tsunami wave activity kas maibasar kadagiti obserbasion ken nagpanawagan iti panangsurot kadagiti pakaammo ken evacuation order dagiti otoridad kadagiti apektado a kabaybayan a lugar.
