Nagpalagip ti Philippine Institute of Volcanology and Seismology (Phivolcs) kadagiti residente nga adda iti aglawlaw ti Bulkan Mayon nga agannad iti posible a panagayus ti lahar gapu iti agtultuloy a panagtudo nga epekto ti Habagat.
Pinasingkedan ni Phivolcs Director Teresito Bacolcol iti Bagong Pilipinas public briefing nga uray adda iti Alert Level 2 ti bulkan ket adda latta pangta na iti posible a panagayos ti lahar a naurnong iti wanga-wangan ken aglawlaw ti Mayon kangrunaan no agtultuloy ti panagtudo na ti napigsa.
Iti agdama, segun ken ni Bacolcol, adda ti mapatta-patta a 90 milyon cubic meters ti volcanic materials iti adda iti aglawlaw ti bulkan. Nagbalaag ti opisial kadagiti umili nga adda iti asideg ti Mayon ken dadduma pay a bulkan iti Pilipinas nga agbalin nga alerto ken dagus nga agbakwit no adda makita a senyales ti panagalboroto.
