Mangisaysayangkat ti pormal nga imbestigasion ti Philippine Navy iti pannakatay ti maysa a trainee-da idi napan a lawas.
Segun ken ni Navy spokesperson Capt. Marissa Arlene Martinez, ti nasao a Naval Officer Candidate a ni Aldwayne Dulnuan ket natay kalpasan a nakompletona ti lima a kilometro a panagtaray iti Naval Station Leovigildo Gantioqui.
Mapapati a na-ulaw ken nagsagaba iti nakaru a panagtigerger idi July 21 sakbay a naawanan iti puot.
Rimmuar met iti initial medical assessment a nakarikna ti cardiac arrhythmia, heat exhaustion, ken electrolyte imbalance ti trainee ken naipan iti ospital tapno maikkan ti medical attention a nakaipananna iti Intensive Care Unit ken na-diagnose iti heat stroke.
Tapno matutokan ti nasao a kondisyon, nayakar iti Ulticare Medical Center ti trainee ngem pimmusay idi July 22.
Naammoan a naaddan ti severe infection a nakaapektar iti central nervous system-na ken nakompromiso pay iti respiratory systema.
Iti agdama ket awan pay ti makitkita nga indikasyon iti foul play ti Navy maipanggep iti insidente.
