Im-imbestigaranen dagiti otoridad ti damag a panagsabog ti cargo hold ti MV June Aster sakbay a napaspas a nagwaras ti asok ken apoy bayat a mapan idiay Coron, Palawan.
Segun ken ni PCG Spokesperson Commodore Noemie Cayabyab, in-inot a serreken dagiti responder ken firefighting team ti sumagmamano a paset ti barko ngem adda pay dagiti paset nga adda danum na isu a kasapulan ti panagannad.
Basar iti statement dagiti sumagmamano a survivors, maipagarup a nakangeg da ti panagsabaog manipud iti cargo hold sakbay a nagwaras ti apoy.
Rinugyan payen ti PCG ti imbestigasyon tapno maammuan ti nagtaudan ti insidente ken no adda dagiti nagkurangan a napasamak.
Kabayatanna, saan pay a nagpakpakita kadagiti otoridad ti kapitan ti MV June Aster.
Segun ken ni PCG Spokesperson Commodore Noemie Cayabyab awan pay ti nagan na iti listaan dagiti survivors.
Nupay kasta, adda dagiti sumagmamano a crew a nangibaga iti shipping company a nakadua da ti kapitan ken natalged daytoy manipud iti insidente.
Pinasingkedan ti PCG a responsibilidad ti kapitan ti kinatalged dagiti pasahero, crew ken kargamento, ket no bilang mapaneknekan nga adda panagkurang na, posible a madusa iti salinong ti linteg.
