Binilinen ni Philippine Coast Guard Commandant Admiral Ronnie Gil Gavan dagiti amin a kamengna a siguradoen nga agbalin a natalged ken nakapia dagiti addang iti Oplan Biyaheng Ayos: Semana Santa 2025.
Gagem ti PCG ti zero maritime casualty ita a Semana Santa ta mangrugi iti Abril 13 agingga 20 ket ingatoda iti heightened alert status ti operasyonda.
Namnamaen ti PCG a minilion a pasahero ti agsangpet kadagiti pantalan agraman dagiti pagpasyaran isu nga ipaspasigurado ti opisial kadagiti amin a Distrito, station, ken sub-station nga agtalinaed a naridam ken agmonitor.
Maibasar iti monitoring ti PCG Command Center ken ti Philippine Ports Authority, umabot iti 1.65 agingga 1.67 milion ti bilang dagiti pasahero a simmangpet kadagiti pantalan idi 2024.
