Narekubre ti Philippine Coast Guard (PCG) ti mapapati a Chinese rocket debris iti asideg iti kabaybayan iti Cuyo, Palawan.
Imbingay ni PCG spokesperson for the West Philippines Sea Comm. Jay Tarriela a nasarakan iti lokal a mangngalap ti nasao debris iti kabaybayan nga asideg iti Barangay Funda Bisucay Island, Cuyo, Palawan.
Rimmuar ti preliminary assessment a ti narekubre a debris ket posible a konektado iti inrusat ti China a Long March rocket idi September 16.
Mapapati a paset ti nasao a rocket launch iti agtultuloy a tignay ti China iti space exploration pakairamanan ti panagipatulod iti satellite ken technological advancements.
Naipanen dagiti nasarakan a debris iti Coast Guard District Palawan ken naiyakar iti Philippine Space Agency (PhilSA) para iti detalyado nga analysis, verification ken assessment iti nagtaudan ken posisyonna.
Naallukoy met ti Palaweños nga agtalinaed a naalibtak ken ireport iti aniaman a makita a posible a rocket debris iti kaasitgan a Coast Guard station, barangay officials wenno mayannatup nga otoridad ken nabalakadanda a liklikan nga iggaman gapu iti posible a safety hazard.
