Pinaglibakan ni Presidente Ferdinand Marcos Jr nga adda impluwensia ti Malakanyang iti panangpili iti Senate President.
Dayta ti nagbalin a sungbat ti presidente kalpasan ti panangibaga ni Senador Rodante Marcoleta a ni dati a Senate President Alan Peter Cayetano ti kakaisuna a nagbalin a lider ti Senado nga awan pammalubos ti Malakanyang.
Segun ken ni Marcos, arigna ‘out of this world’ ti nasao a kapanunotan a kabaelanna nga idiktar ti agbalin a resulta ti binnotosan iti Senado ta daytoy ket eksklusibo a decision dagiti senador, saan ket a ti Malakanyang.
Nupay aminado nga imon-monitor ti Malakanyang dagiti pasamak iti Senado ta napateg daytoy a paset ti gobierno, inlawlawagna a saan nga isuna ti mangitudtuding no asino ti nasken a mangidaulo iti Senado.
Kas presidente ken dati a senador, kunana nga ammona a saan a mabalin nga ibaon ti asino man a senador no asino ti kayatda a botosan kas Senate president.
