Nakalukat ni Presidente Ferdinand Marcos Jr. iti gakat a mang-painget wenno mangiparit kadagiti naranggas nga online games kasaruno ti napasamak a pammaltog iti maysa a pagadalan idiay Tacloban City.
Segun ken ni Palace Press Officer Atty. Claire Castro, trinatar ti gobierno ti posibilidad a panangiparit ti sumagmamano nga apps wenno online content a mabalin a mangpataud ti madi nga epekto kadagiti menor de edad.
Nagbalin a paset ti patangan dagiti singasing nga ingetan ti access ti agtutubo iti naranggas nga online games kalpasan a rimmuar ti report dagiti menor de edad a karaman iti pammaltog iti San Jose National High School ket aktibo nga agay-ayayam ti maysa a violent online game.
Innayon ni Castro a nakasagana ti administrasion a suportaran dagiti addang ti Kongreso tapno masukisok dagiti posible a regulasion iti panagaramat ti online content, partikular kadagiti agtutubo.
