Inwaragawag ni Presidente Ferdinand Marcos Jr ti ‘big-time’ rollback iti presio dagiti produkto-petrolyo inton Martes, Abril 14.
Ti pannakaiwaragawag ti nasao nga addang ket kas panangpabileg iti immunan a panangdakamat ti Department of Energy mainaig iti dakkel a lumakaan ti presio ti petrolyo ita a lawas.
Segun ken ni Marcos, nasurok P20 ti lumakaan ti diesel; P4.43 iti kada litro ti gasolina; ken P8.50 kada litro ti kerosene.
Bigbigen ti presidente a dakkel a tulong daytoy kadagiti drayber, commuter, ken iti kada pamilia nga inaldaw a maap-apektaran iti nangina a presio ti krudo.
Kabayatanna, inkari pay ni Marcos nga iti sumarsaruno nga aldaw ket iwaragawagnanto dagiti addang ken tulong manipud iti gobierno ta saanda nga itulok a mabaybay-an dagiti umili.
