Nagyaman ti maysa a para-athlete a nakagun-od iti medalya iti ASEAN Para Games kadagiti timmulong ken simmuporta kenkuana iti daytoy a labanna.
Iti pannaki-uman ti Bombo Radyo Vigan ken ni Ernie Gawilan, kangrunaan a pinagyamananana ti Philippine Sports Commission gapu iti suporta nga impaayda kadakuada kas iti day allowance, ken uray pay dagiti coach ken tao a nagtalek iti kabaelanda.
Maysa kadagiti kunana a karit kadakuada iti daytoy a pasalip ket ti dakkel a pannakaikawada iti venue ti training ta na-renovate iti 50m pool a paglanglangoyanda isu a nagbalin laeng a 25m pool ti nagsanayanda ita.
Bigbigen ken pagyamanan ni Gawilan a nagbalinen a dakkel a paset ti sports tapno maipakitada ti talugadingda kas PWD ket ibilangna daytoy a namnama para kadakuada.
Ita a tawen ti ASEAN Para Games, 2 a gold, 1 a silver, ken 2 a bronze ti nagun-od ti nasao a para-athlete.
