Kiniddaw ti Cagayan Police Provincial Office kadagiti umili iti pannakitinnulongda para iti pannakemmeg iti suspek a nangpaltog ken ni Rizal, Cagayan Mayor Joel Ruma a gappuanan ti pannakatayna.
Iti pannaki-uman ti Bombo Radyo Vigan ken ni PCpt. Shiela Joy Fronda a Chief PIO iti Cagayan Police Provincial Office, kiddawna kadagiti umili nangruna kadagiti agindeg idiay Barangay Illuru Sur, Rizal, Cagayan iti panakitinnulongda tapno makemmeg ti suspek a nanagpapatay iti mayor bayat iti panagkampaniana idi rabii iti April 23, 2025.
Segun ken ni Fronda, maisayangkat koman iti picture taking ni Mayor Ruma kaduana ti kapartido ken supporter-na idin pinaltogan ti suspek a mapapati nga adda iti kabambantayan a paset iti lugar.
Iti imbestigasyon dagiti otoridad ket 80-100 meters iti kaadayo ti suspek manipod iti biktima ken nasurok-kumurang 40 feet iti kangato ti ayan ti suspek manipod iti kalsada nga asideg iti Barangay Hall nga ayan ti biktima.
Maipalagip a natamaan ni Mayor Ruma iti anterior right shoulder-na isu a naipan iti Tuao Hospital ngem naideklarar a natay ket karaman pay a nagsagaba dagiti tallo a tattao a nabigbig a da Merson Abiguebel a nagsagaba ti gunshot wound iti akin-kannigid a sikona, ni Arnel Talay a nadaplisan ken ti asawana a nagsagaba ti gunshot wound iti left breast ken likodna a naipan iti Cagayan Valley Medical Center para met iti pannakatamingna.
Kabayatanna, nu man pay adda kalaban ti mayor para iti umadanin nga eleksyon ket awan ti naidanon kadagiti otoridad a nakaawat ti mayor iti death threat a mabalin koma a makatulong iti imbestigasyon.
