Umabot iti uppat a pulo ti natay kabayatan a walo ti nadunor kalpasan a natinnag iti derraas ti maysa a napaspas ken overload a pampasahero a bus idiay Pakistan.
Naawanan ti kontrol ti bus ken natinnag iti derraas iti Dana Sar, maysa a nasulinek a lugar asideg iti pagpatinggaan ti probinsia ti Balochistan ken Khyber Pakhtunkhwa.
Basar iti imbestigasion, kalaksidan iti orihinal a pasahero na, inlugan pay ti bus dagiti pasahero manipud iti maysa pay a bus a nadadaelan, rason tapno nalabes wenno overload ti karga ti lugan.
Segun ti maysa a nakalasat, maipagarup a naaddaan ti riri iti uneg ti bus kalpasan a nagsardeng ti driver tapno mangilugan pay ti nayon a pasahero.
Mapapati nga adda maysa a pasahero a nangdanog iti tengged ti drayber, rason a saanna a nakontrol iti manibela sakbay pay a matinnag ti bus.
Agtultuloy a ber-beripikaren dagiti pannakabagi ti linteg no pudno ti statement iti maysa a nakalasat.
