VIGAN CITY – Im-imbestigaranen dagiti kameng ti Sta. Maria Police Station ti pakabigbigan dagiti suspek a nangpapatay ken ni Jonalyn Ecraela, agtawen ti uppat a pulo, agnaed idiay Bigbiga, Santiago a nasarakan iti bangkay na a naiwalang iti kataltalunan idiay Sitio Romas, Brgy. Suso, Sta. Maria nangruna idiay likudan ti kapilya ti Jehovah’s Witnessess idi kalman sakbay iti pangaldaw.
Agdaldalus ni Fredelino Calibuso nga agtawen ti lima pulo ket lima nga agnaed idiay Barangay Poblacion Sur, Sta. Maria iti talon na idi nakita na iti bangkay ti biktima a nakababa iti sapin na ken dara- dara ti rupa na.
Agsipud iti dayta, inpakaammo na iti nakita na ken ni Jocelyn Leonson, agtawen ti uppat a pulo, maysa a government employee nga isu ti nangidanun kadagiti pannakabagi ti linteg.
Posible a sakbay a pinatay dagiti suspek ti biktima ket tinakawan da pay agsipud ta idi binigbig dagiti kameng ti pamilya na iti bangkay, nakita da nga awanen dagiti suot na nga alahas ket patien da pay a narames ti biktima agsipud ta nakababa iti sapin na.
