VIGAN CITY – Patien ni Buhay Partylist Rep. Lito Atienza a sangagasut a porsiento a legal ti pannakaipatugaw ti Marinduque Rep. Lord Allan Velasco kas baro a lider ti kamara babaen iti 186 naur-orna a botos.
Iti pannaki-uman ti Bombo Radyo Vigan ken ni Cong. Atienza, kinonsultada amin a legal expert para iti nasao a banag isu nga awan ti rumbeng a makwestyonaran ken ita nga aldaw, manamnaman nga idaulwan ni House Speaker Lord Allan Velasco ti session para iti pannakatratar ti 2021 proposed national budget.
Naragsakan ni Atienza a nabigbig ti desisyon dagiti padana a kongresista agsipud ta nalawag a naad-adu kadagiti miembro ti kongreso ti mangayat a masukatanen ni dati a House Speaker Alan Peter Cayetano isu a para kenkuana ket nakababain dagiti komonkontra pay laeng iti pannakailungalong ti baro a lider.
Malaksid ti dayta, pinasingkedan ti kongresista a saanen a rumbeng nga ipilit pay laeng ni Cayetano ti bagina nga agserbi agsipud ta naited kenkuanan ni Velasco ti tiempo a panagturayna.
