Kasla tagtagainep pay laeng ken ni Josh Andrew Medina Martija, graduate a Magna Cum Laude manipod University of the Philippines – Diliman iti pannakapasa ken panagbalinna a Rank No. 2 iti Civil Engineers Licensure Examination.
Iti pannaki-uman ti Bombo Radyo Vigan ken ni Engr. Martija, saanna nga impagarup nga agtopnotcher ta kayatna laeng a maipasa ti exam ngem nasaysayaat pay gayam ti maipaay kenkuana.
Segun ken ni Engr. Martija, ita a maysan a civil engineer ket kalikagumna a makaipaay iti dakkel a tulong tapno mapasayaat iti infrastructure ken sistema iti pagilian nagruna iti transportation crisis.
Patienna nga itan a naan-anayen nga inhinyero ket obligado iti akem para iti panangpasayaat ti sistema a mangparparigat kadagiti umili iti pagilian.
Imbingayna nga idi ubing pay laeng ket arapaapna iti agpatakder iti bukodna a pagtaengan ngem ita ket namnamaenna a makatulong pay kadagiti umili.
Agpada nga Engineers dagiti nagannakna nga isu metten ti nakaimpluwensyaanna para iti panangragpatna iti arapaapna.
Nagyaman ni Engr. Martija kadagiti amin a nangsuportar kenkuana nanagruna iti pamiliana, gagayyem, kabagyan ken ti Namarsua.
