Gagem a maipaayan iti panangbigbig ti sakripisyo ken kinapateg ti akem dagiti mangisursuro iti kagimungan kalpasan ti pannakaipila manen idiay Kamara ti gakat a mangituding ti minimum salary dagiti public school teachers iti P50,000 kada bulan.
Inaramid da Representative Antonio Tinio iti ACT Teachers party-list ken Renee Co iti Kabataan party-list ti singasing iti salinong ti House Bill 203 a naipila idi June 30, umuna nga aldaw iti terminoda kas agpampanday linteg para ti 20th Congress.
Iti pannaki-uman ti Bombo Radyo Vigan ken ni Antonio Tinio manipod ACT Teachers Partylist, nabiit pay laeng nga immabot ti P30,000 entry-level salary dagiti public school teacher a maipada kadagiti police ken suldado ngem patienna a nasaysayaat nu maited kadakuada iti pudpudno a sueldo a makabael a makagatang iti pagbiagda ken ti pamiliada.
VIDEO – REP. ANTONIO TINIO
Kagiddan dayta ket impaganetgetna iti pagkasapulan a pannakaipasa ti House Bill 202 wenno iti Living Wage a kasapulan dagiti Pilipino.
Kinuna ni Tinio a saan nga umanay ti minimum wage laeng nga ikankanay dagiti tunggal pamilia ta masapul iti ad-adu a sapul para iti inaldaw-aldaw a gatangen.
Iti baet nga inaprubaran ti regional wage board ti P50 wage hike kadagiti private sector workers idiay National Capital Region ket patien ni Tinio a saan latta nga umanay gapu iti agtultuloy met nga ingingina dagiti magatang, transportasyon, serbisyo, kuryente, danum, langis ken dadduma pay.
VIDEO – REP. ANTONIO TINIO
