Plano ti Senado a parmeken ti panagwaras dagiti peke a Person With Disability (PWD) ID cards.
Segun ken ni Senador Sherwin Gatchalian, maysa a bilion a pisos ti kurang iti public treasury gapu iti pannakausar ti peke a PWD ID tapno makaala iti 20% discount ken exemption iti value added tax (VAT).
Nakita nga adda dagiti indibidual nga aglaklako iti peke a PWD ID iti nadumaduma a paset ti pagilian.
Nasurok a 100 a peke a PWD ID ti nasarakan idiay Bacolod City, ken saan a kumurang a 7 a peke nga ID ti nakumpiskar idiay Cebu City.
Segun kenni Gatchalian a ti panagusar kadagiti peke a PWD ID ket panagtakaw iti pastrek ti gobierno gapu ta dagiti saan a kualipikado ket makaalada iti discount ken exemption.
Apektaranna pay dagiti programa ti lokal a gobierno a nairanta a tumulong kadagiti PWD.
Madanagan met dagiti akinkukua iti restaurant gapu iti pannakalugida gapu iti pannakausar dagiti peke a PWD ID.
Basar kadagiti restaurant, immadu ti bilang dagiti PWD cardholders a makaal-ala iti discount, a nagresulta iti panagbaba ti matgedanda.
Plano ni Gatchalian ti mangaramid iti linteg wenno polisia a mangrisut iti parikut dagiti peke a PWD ID.
