VIGAN CITY – Manarimaan pay laeng iti imbestigasyon dagiti kameng ti linteg idiay Candon City inaig iti panagtakawan kadagiti water pump ken makina ti kuliglig idiay Parioc 2nd ken Patpata 2nd idi July 2.
Segun ken ni Police Lt. Col. Jugith del Prado, hepe ti Candon City Police Station, kitkitaen da nu adda iti koneksyon dagiti panagtakawan idi kalman kadagiti immun-unan a napasamak a panagtakawan ngem aminado ti hepe a marigatan da ta awan pay laeng iti maitudo da a suspek agingga itatta.
Idiay Parioc 2nd, Candon City, intaray dagiti saan pay nabigbig a suspek iti RK 60 water pump ni Benedicto Gadut Valdez nga agtawen iti innem a pulo ket siyam, naasawaan, mannalon ken agnaed iti nasao a lugar nga inbati na iti igid iti kalsada nga asideg ti irrigation canal a pinapadanum na iti talon na.
Kabayatanna, idiay met Patpata 2nd, innala dagiti saan pay nabigbig a suspek iti Kubota RK 70 7 HP diesel engine a makina iti kuliglig nga inparking ni Barangay Kagawad Cesar Valdez Toquero nga agtawen iti lima pulo ket pito iti bakante a lote iti asideg iti pagtaengan na.
