VIGAN CITY – Inlawlawag ni Pol. Capt. Jose Bandong II, hepe ti Tagudin Municipal Police Station a dagiti agsangpet iti Tagudin border control checkpoint nga aggapu iti sabali a lugar ket maudi a dumalan iti Provincial Disaster Risk and Reduction Management Office (PDRRMO) sakbay a makastrekda iti probinsia.
Dayta ket gapu iti positibo nga Authorized Person Outside Residence a pulis a nakalasat iti checkpoint babaen iti panangiparangna iti daan a resulta ti RT PCR test a dimmalananna idi September.
Iti pannaki-uman ti Bombo Radyo Vigan ken ni Bandong, numan adda sumangpet a biahero ket maidamag kadakuada no papananda ta no lumabasda laeng iti Ilocos Sur ket adda ti maited a checkpoint sticker a nakailanadan ti nagan ti drayber ken no mano dagiti pasaherona nga isunto met ti kitaen dagiti nakabantay iti Sinait border ken makita a naimbag no kompleto dagiti pasaheroda wenno adda ti dimsaag.
Inkalintegan ni Bandong nga awan iti pakabasulan ti PNP ta saan nga isuda ti pinal nga agdesisyon kadagiti lumasat iti probinsia agsipud ta ti pasyente ket naipan pay met iti PDRRMO nga isuda ti mangkita a naimbag kadagiti dokumento a kasapulan kas ti resulta ti Covid19 test ken dadduma pay.
