VIGAN CITY – Masapulen a mangala iti stub dagiti agturong iti Vigan Conversion Complex idiay San Julian, Vigan City tapno masurot iti social distancing kas panangsurot iti health and safety protocols gapu iti covid-19.
Ti Christmas Village iti siudad iti Vigan ket napintas a pagalaan iti ladawan gapu iti naraniag a silaw gapu iti nadumaduma a dekorasyon a mangipasimudaag iti panangrambak ti paskua.
Iti pannaki-uman ti Bombo Radyo Vigan ken ni Public Employment Servce Office (PESO)- Vigan City Manager Ronilda Aninag, gapu iti panagdudupudop dagiti tao a mapmapan tunggal rabii iti nasao a lugar ket masapulen iti mangala ti stub dagiti agturong ket uppat a pulo a tao laeng iti mapastrek nga agpaut iti duapulo a minutos iti uneg.
Segun ken ni Aninag, ti nasao a stub ket mabalin a maala iti agingga iti oras iti alas tres iti malem ket malimitaran iti agingga lima gasut iti maikkan.
Ti nasao a banag ket gapu iti pannaka-obserbarda a saanen a masursurot iti sumagmamano a pagannurutan kontra covid-19 ken tapno saan unay nga adu iti makipila iti kalsada nga aguray.
Innayonna pay a tinawen nga adda iti pagpasyaran iti nasao a lugar ket dagiti inaramatda a pinagdekorar ita a tawen ket recycled materials manipod kadagiti naglabas a tawen.
