Paimbestigaran ni Senior Citizens Partylist Rep. Rodolfo Ordanes iti Department of Health ken Philippine Health Insurance Corporation ti mapapati a panaglabsing dagiti ospital iti Zero Balance Billing ken Anti-Hospital Detention Law.
Segun ken ni Ordanes, nakaawatda iti reklamo manipud kadagiti senior citizen a nagpaagas iti Philippine Hear Center, Veterans Memorial Medical Center, National Kidney and Transplant Institute, ken Sorsogon Medical Mission Group Hospital and Health Services Cooperative.
Innayon ni Ordanes nga adda ti senior citizen a kimmamang iti opisinana gapu ta dua aldawen nga agur-uray iti bakante a kuarto iti VMMC.
Nagpanawagan ti kongresista iti DOH a siguradwenda nga amin nga ospital, pampubliko man wenno pribado ket sumursurot iti husto a discharge protocol ken saanda a lapdan dagiti senior citizen gapu laeng ti kinakurang iti pagbayad ken sumurot iti husto nga usar ti Guarantee Letter manipud iti Medical Assistance to Indigent and Financially Incapacitated Patients Program ti DOH.
