VIGAN CITY – Agtultuloy ti panagkiddaw ti city government ti Vigan iti national government nga ipalubosdan iti panagkalubbon ti motorsiklo agsipud ta naisakup metten iti modified general community quarantine ti siudad.
Iti pannaki-uman ti Bombo Radyo Vigan ken ni Mayor Juan Carlo Medina, namnamaenna ti pannakaaprubar ti nasao a banag ta immunan a pinasingkedan ti national government a pagpapatangandan iti Inter Agency Task Force no maipalubosen ti panagkalubbon kadagiti lugar a napalukayanen dagiti pagannurotan.
Kabayatanna, dagiti pay laeng dati a pagannurotan ti masurot iti siudad ta awan pay laeng ti baro nga inyulog ti national government ken ur-urayenda ti guidelines nga ipatungpal ti Department of Transportation.
Pinalagipan ti mayor dagiti umili nga uray no napalukayanen dagiti pagannurotan a maipatpatungpal iti siudad ket kasapulan latta a sumurot no ania dagiti wagas a mangliklik iti COVID19 para iti kinatalged ti tunggal maysa.
