Natay ti maysa a lalaki gapu iti panagdinnungpar dagiti dua a motorsiklo iti national highway idiay Barangay Becques, Tagudin, Ilocos Sur.
Ti biktima ket agtawen iti duapulo ket walo, minaneho ti maysa a Rusi 155 motorcycle. Kinalubbonna ti maysa nga agtawen-iti-duapulo ket innem a lalaki, agpadada a taga-Barangay Gabur Sur, Sta. Cruz.
Ti met Yamaha YTX 125 ket minaneho ti lalaki nga agtawen iti duapulo ket walo, taga-Borono, Tagudin.
Daldalyasaten dagiti dua a motorsiklo ti agsinnumbangir a linya idi nagdinnungparda.
Naipurwak iti kalsada dagiti dua a drayber ken ti backrider ti Rusi motorcycle ket nadunor ti nadumaduma a paset ti bagida.
Dagus a naitarayda iti ospital para iti naan-anay a pannakatamingda ngem naideklarar a dead on arrival ti drayber ti Rusi 155 motorcycle.
