Agtultuloy ti imbestigasyon dagiti pannakabagi ti linteg iti pammaltog a nakatayan ti maysa a senior citizen idiay Barangay San Antonio, Bangued, Abra.
Nabigbig ti biktima a ni Nona Castillo, agtawen iti innem a pulo ket tallo, presidente ti Farmers Association.
Iti pannaki-uman ti Bombo Radyo Vigan ken ni PLTCOL. Daniel Pel-ey, Public Information Officer ti Abra Police Provincial Office, nakilugan ti biktima iti kurong-kurong minaneho ti kaanakanna ta agturongda koma idiay Barangay Bañacao idin dimteng ti suspek iti likudanna ket pinaltuganna ti biktima.
Nagsagaba iti tama ti paltog ti biktima kangrunaan iti bukotna a naipaagas iti ospital ngem naideklarar a dead on arrival.
Narekobre manipud iti nakapasamakan ti krimen ti dua a fired cartridge ti caliber 45.
Manarimaan met ti pannakipatang dagiti pannakabagi ti linteg iti pamilia ti biktima agraman ti asosasyon nga iggemna tapno makaalada iti mabalinda a pamalpalatpatan no ania ti posible a motibo ti nangpaltoganda kenkuana.
Iti agdama, saanda pay laeng a maibaga no daytoy ket adda pakainaiganna iti umadani a panagpipili.
