VIGAN CITY – Manarimaan pay laeng iti naun-uneg nga imbestigasyon dagiti otoridad idiay probinsiya ti Abra inaig ti dua nga insidente iti pammaltog a nakatayan ti maysa nga aktibo iti serbisyo a kameng ti Philippine National Police ken maysa a drug personality.
Maibasar iti impormasyon a naala ti Bombo Radyo Vigan, idi alas – 8: 30 iti agsapa idi January 27, pinaltugan dagiti saan pay nabigbig a suspek ti biktima a ni Rex Malangen Bonnit nga agtawen ti uppat a pulo ket maysa, drug personality nga agnaed idiay Sitio Banbani, Barangay Padangitan, Danglas, Abra.
Nakalugan iti motorsiklo ni Bonnit ket daldalyasaten na ti Abra – Ilocos Norte road, nangruna idiay Sitio Dalaguisan, Barangay San Gregorio, La Paz, Abra idi pinaltugan dagiti suspek a nagpadaya a direksyon wennu nagturong iti dalan a mapan idiay Barangay Toon, La Paz, Abra kalpasan iti pammaltog.
Naitaray idiay Abra Provincial Hospital ti biktima ngem naideklerar a dead on arrival.
Kabayatanna, dead on arrival met laeng idiay Seares Hospital, Bangued, Abra ni Police Master Sergeant Frederick Fernandez Ybañez a tubo ti Cebu City a nakadestino idiay Villaviciosa municipal police station idi pinaltugan dagiti saan pay nabigbig a suspek idi agsapa idi kalman, January 28.
Agawid kuman iti up-upaan na a kwarto idiay Barangay Poblacion, Villaviciosa ti biktima idi pinaltugan dagiti suspek a nagsagabaan na iti tama iti naduma-duma a paset iti bagi na a poon iti nakatayan na.
Nakita iti nakapasamakan iti pammaltog ti lima a basyo ti caliber 45 ken maysa a basyo ti 9mm.
