VIGAN CITY – Manarimaan pay laeng iti imbestigasyon dagiti otoridad idiay ili ti San Juan inaig iti pammaltog a napasamak idi alas nuwebe singkwenta ti rabii ti April 27 idiay Guimod Sur, San Juan
Ti nasao a pammaltog ket nakatayan ti biktima a ni Ruzziel Pagaoa Lumibao nga agtawen iti uppat a pulo ket maysa, balasang ken agnaed iti nasao a lugar.
Maysa kadagiti kitkitaen dagiti otoridad idiay San Juan nga idaulwan ni Police Captain Jade Macaraeg a posible a motibo iti pammaltog ket iti panagpautang ti biktima ta malaksid iti trabaho na kas singer iti banda ket agpapaporsyento wennu agpapautang pay.
Nagsagaba iti tama iti paltog iti bukot ti biktima ta agawid kuman a naggapu iti nagkantaan da a barangay idi pinaltugan dagiti suspek iti nasao a lugar ket uray nu naitaray idiay Magsingal District Hospital ket naideklerar a dead on arrival gapu ti tama iti paltog a sinagaba na.
