VIGAN CITY – Im-imbestigaran dagiti kameng ti Santiago Police Station ti napasamak a pammaltog a nakatayan ti biktima a ni Eduardo Sabado alyas Siano nga agtawen ti lima pulo ket pito, caretaker ti Magic 5 Beach Resort idiay Barangay Ambucao, Santiago idi kalman, January 21.
Ti pannaki-uman ti Bombo Radyo Vigan ken ni P/Lt. Rodel Ragasa, hepe ti Santiago municipal police station, agdaldalus ti biktima iti uneg ti resort idi mapapati a simrek dagiti suspek ket pinaltugan da ti biktima.
Nakangngeg ti putot ti biktima iti putok iti paltog isu a napan na kinita ti ama na ket nakita nan a napasag ti biktima a dara-dara.
Nagsagaba ti tallo a tama iti paltog ti ulo ti biktima ken maysa a tama ti paltog iti barukongna a poon iti nakatayan na.
Ti biktima ket dati a drug surrenderee idi kabarbaraan ti Oplan Tokhang.
Agsipud iti dayta, kidkiddawen dagiti otoridad iti pannakikinnammayet dagiti umili ta nu adda ammo da a makatulong iti imbestigasyon da para iti pannakasolbar iti kaso ket ipakaammo da kadakuada tapnu maikkan iti hustisya iti pannakatay ti biktima.
