Mamati dagiti pamilia ti mapapati a biktima iti extrajudicial killings a saan a patgan ti International Criminal Court iti singasing a maidalan iti house arrest ni dati a Presidente Rodrigo Duterte bayat a mayur-uray ti posible a pannakadengngeg ti kaso a crimes against humanity inton Setyembre 23.
Segun ken ni Atty. Maria Kristina Conti, assistant to counsel iti ICC ken secretary general ti NUPL-NCR, awan ti umdas a pagibasaran a legal wenno medical, ti resolusyon nga impila ni Sen. Alan Peter Cayetano a mangkidkiddaw iti pannakaidalan ni Duterte iti house arrest.
Impaganetget ni Conti nga awan met laeng ti kongkreto nga ebidensya iti mapapati a kasasaad iti salun-at ti dati a presidente, ket impatangkenna a saan a bigbigen ti ICC ti kastoy a klase ti addang.
Ania man a kiddaw para iti temporaryo a pannaka-wayawaya ti dati a presidente ket masapul nga idalan iti husto a proseso iti nagbaetan ti prosekusyon, depensa ken dagiti hukom ti korte.
