VIGAN CITY – Nakemmeg iti maysa lalaki a pahinante a naglibas ken timmaray iti kabakiran a paset ti Brgy. Lungog Narvacan.
Nabigbig ti pahinante ti truck a ni Tanny Mar Laureta Blaza agtawen tallo pulo ket lima nga agnaed ti Brgy. Palao, Bangued, Abra.
Iti pannaki-uman ti Bombo Radyo Vigan kenni PCapt. Arcadio Villoria, hepe ti Narvacan Municipal Police Station, nadlaw dagiti kagawad ti barangay nga adda iti Isuzu 10 wheeler truck a nakaparking iti igid ti kalsada ket dimsaag ti lalaki.
Sinaludsud dagiti kagawad iti nagan ken dagiti dokumento a kasapolan iti agdama a pandemya ngem isigida a timmaray iti kabakiran a paset ti nasao a barangay.
Nagpaarayat dagiti opisyal kadagiti kameng ti Regional Mobile Force Company 1 iso a nakemmeg ti suspect.
Innayon ni Villoria nga inamin ti suspect a nagaramat isuna ti maiparit nga agas sakbay iti panagbiyahe da a naggapo ti manila.
