VIGAN CITY – Natalek ni Ilocos Sur 1st District Rep. Deogracias “DV” Savellano a masolusyonan dagiti parikut ken pagkasapulan iti tunggal distrito ti pagilian babaen iti pannakatratar ita nga aldaw ti naisingasing a 2021 proposed national budget.
Iti pannaki-uman ti Bombo Radyo Vigan ken ni Cong. Savellano, nalawag iti bilin ni Presidente Rodrigo Duterte a ti kangrunaan a gagemda iti session ket ti pannakaipasa ti badyet ket saan nga iti isyu ti term sharing da House Speaker Marinduque Rep. Lord Allan Velasco ken ni Rep. Allan Peter Cayetano.
Impaganetget ni Savellano a saanen a mabalin a masurot manen ti 2019 national budget ta awan ti nakailanad a badyet para iti Covid19 pandemic nga isu ti kangrunaan a mairaman para iti nasao a gakat.
Pinasingkedan ti kongresista nga adda ti pormas a naited kadakuada nga agpanpandaylinteg tapno isu pangikabilanda dagiti pagkasapulan ti distritoda ken mailatangan ti pondo.
