Nangiruar ti Pasig City Regional Trial Court (RTC) ti status quo ante order a temporaryo nga ipasardeng ti implementasyon ti nayon nga P85 nga inaldaw a minimum wage para kadagiti mangmangged iti pribado a sector idiay Metro Manila.
Iti dua a panid iti bilin, impalubos ni Pasig RTC Executive Judge Achilles Balauitan ti petision nga impila ti Readycon Trading and Construction Corp. ken R-II Builders Inc.
Gapu ti bilin, maipatungpal latta ti dati a minimum wage rate bayat a dengdenggen ti korte ti Wage Order No. NCR-26 nga inruar ti Regional Tripartite Wages and Productivity Board (RTWPB) idiay National Capital Region.
Maipalagip a naaprubaran ti P85 a nayon ti minimum wage kadagiti mangmangged idiay Metro Manila a nakaituding a mangpangato iti inaldaw a sueldo dagiti non-agriculture workers manipod P645 nga agbalin a P730.
Kabayatanna, manamnama a maaddaan pay iti sumarsaruno a panagdenggeg maipanggep iti pannakaipatungpal ti wage order.
