Agsagsagana ni Presidente Ferdinand Marcos Jr a mangnayon iti suporta iti irigasion para kadagiti mannalon kas panagsagana iti manamnama a nakaro nga El Niño a mangrugi iti katapusan ti tawen agingga rugi ti 2027.
Mailatang ti P30.44-B para iti Irrigation Services Program (ISP) ti National Irrigation Administration (NIA) babaen ti National Expenditure Program (NEP) a naituding a managnayon iti 11,153 nga ektarya a baro a lugar ti serbisio ti irigasion.
Inlawlawag ni Palace Press Officer Claire Castro a paset daytoy iti food security agenda ti administrasion tapno mapapigsa ti produksion ti taraon, produktibidad ti talon ken ti matgedan dagiti mannalon ken mangngalap.
Kitkitaen pay ti gobierno ti pannakausar dagiti alternatibo a teknolohia kas iti solar-powered irrigation systems tapno ad-adda a suportaran ti sektor ti agrikultura iti sango ti epekto ti panagbalbaliw ti klima.
