Inkalintegan ti Malakanyang ti National Food Authority kalpasan ti pannakababalawna iti social media gapu iti panagilako iti bagas nga aggatad iti P20 kada kilo kadagiti lugar nga inapektaran ti bagyo ken gingined, imbes a libre nga ipaayda.
Segun ken ni Communications Usec Claire Castro, iparit ti linteg iti NFA ti panagited iti bagas nga awan bayadna.
Dagiti ahensia kas ti Department of Social Welfare and Development (DSWD), Department of Public Works and Highways (DPWH), ken Department of Human Settlements and Urban Development (DHSUD) ti rebbengna a mangted iti tulong ken ayuda kadagiti biktima ti didigra.
Immunan a pinasingkedan ti Malakanyang a nangiruar ti Office of the President iti P158.3 milion a cash assistance para kadagiti lokal a gobierno idiay Davao Oriental nga inapektaran ti nagsaruno a gingined idi napan a lawas.
