VIGAN CITY – Binalakadan ti Taiwanese government dagiti Overseas Filipino Worker (OFW) a liklikan da pay laeng iti rumuwar kadagiti paggigiyanan da nu awan iti napateg a papan da gapu iti pangta ti novel coronavirus.
Segun ken ni Bombo International Correspondent Ana Marie Acosta a taga- Quirino ngem nabayagen nga agtrabtrabaho idiay Yunlin, Taiwan, karaman kadagiti kanayon a maipalagip kadakuada iti panagaramat ti mask nu rumuwar da ken agbuggo ti ima tapnu maliklikan iti nasao a sakit.
Ingunam-gunam na nga uray nu saan pay nga adu dagiti naapektaran iti nasao a sakit, nainget iti monitoring iti gobiyerno ti Taiwan nangruna dagiti aggapu idiay China nga isu iti nagtaudan ti nasao a sakit.
Malaksid iti dayta, kadagiti mall ken supermarket ket kitkitaen da a naimbag iti temperatura ti tunggal tao a sumrek wennu mapan.
Kas paset iti panagan-annad ken panangliklik iti nasao a sakit, nu dadduma ket adda ti libre a mask nga iteted dagiti ospital iti nasao a pagilian kasta pay a dagiti restaurant ket adda sanitizer a nakaplastar iti ruwangan da a mabalin nga aramaten dagiti customer.
