Nagkiddaw ni Ombudsman Jesus Crispin Remulla iti update iti administrative case kontra iti pito nga agdama a hues ti Court of Appeals nga inpila ni dati nga Ombudsman Samuel Martires.
Naireklamo dagiti hues gapu iti nakaro a kinaignorante iti linteg ken panaglabsing iti interes ti publiko mainaig iti temporary restraining order maibatay iti preventive suspension ti sumagmamano nga opisial iti Antique.
Segun ken ni Remulla, awan pay ti nakitana a rekord a nagtignay wenno nagdesision ti Korte Suprema wenno Judicial Integrity Board iti kastoy a reklamo.
Pinagduaduaanna pay dagiti desision ti Court of Appeals a nangbaliktad kadagiti natakuatan ti Ombudsman.
Kabayatanna, indagadag ti Korte Suprema ni Remulla a mangipila iti reklamo ken mangipaay iti ebidensia no adda dagiti nakabasol a hues.
