Nagpanawagan dagiti progresibo a grupo iti Office the Ombudsman a dagus nga agipila ti kaso a kriminal kontra ken ni Senador Joel Villanueva ken dadduma pay a karaman iti maanomalya a flood control projects.
Karaman kadagiti nag-protesta ti Samahan ng Progresibong Kabataan (SPARK) iti sangoanan ti opisina ti Ombudsman tapno pasungbaten dagiti indibidwal iti kaso ti korapsion.
Madanagan ti grupo gapu ta nasurok dua a domingo ti napalabas idi imbaga ni Ombudsman Crispin Remulla a nakasaganan ti kaso a plunder kontra ken ni Villanueva ngem awan pay ti pormal a tignay.
Maipalagip a nairaman ni Villanueva iti kontrobersiya kalpasan nga innaganan isuna ni dati a DPWH engineer Henry Alcantara a nakaawat ti P150 milyon kickback manipud iti maysa a P600 milyon a proyekto idiay Bulacan, banag a pinaglibakan met ti senador.
