VIGAN CITY – Agawiden tatta nga aldaw ditoy Pilipinas ni Marilou Tamano, agtawen ti dua pulo ket lima, ti Overseas Filipino Worker idiay Dammam, Saudi Arabia a kinabkabil ti amo na a babai a naisalakan babaen iti panagkikinnammayet dagiti maseknan nga ahensya ken grupo dagiti OFW.
Ti eksklusibo a pannaki-uman ti Bombo Radyo Vigan ken ni Tamano, direkta idiay Philippine Overseas Labor Office- Al Khobar, nadakamat na a ti suweldo a saan na a naaw-awat manipud idi Nobyembre iti napalabas a tawen ket maala nanto met laeng ta ited to iti recruitment agency na ditoy pagilian ta nu saan ket maipaserra da, karaman iti recruitment agency na idiay Saudi Arabia.
Innayon na pay a nu makaawid ton iti sidong iti pamilya na idiay Ilagan City, Isabela ket agsapul ton iti trabaho na iti asideg iti lugar da tapnu mataripato na iti pamilya na, nangruna dagiti dua nga annak na.
Mainaig dayta, napalaus met iti panagyaman na kadagiti opisyal ti Overseas Workers Welfare Administration ken Department of Foreign Affairs a nangtulong kenkuana tapnu makaawid, pakairamanan dagiti pada na nga OFW a kas kada Romella Bayatin, ti nurse a napan nangted iti kanen ken bado na idi naipanen idiay POLO – Al Khobar kenni Marilou De Guzman Cabotage nga isu iti nagipost iti social media iti kasasaad na.
Inbingay ditoy Bombo Radyo Vigan ni Cabotage iti napasamak idi ken ni Tamano a malaksid a kabkabilen iti amo na a babai ket sinelselan na pay iti plastic bottle iti mabagbagi na san a inikkan ti chili powder ken invideo na pay a lamu-lamo.
