VIGAN CITY – Maitabonen inton bigat ni Perlita Guillermo Mendoza a natay iti napasamak a panagbettak idiay Beirut, Lebanon. Idi kalman idi simmangpet iti bangkay ni Mendoza kadua ti Overseas Worker Welfare Administration idiay Candon City ket naiyawid iti pagtaenganda idiay Brgy. Carcarabasa, Lidlidda.
Iti pannaki-uman ti Bombo Radyo Vigan ken ni Giovanni Mendoza, asawa ni Perlita, insigida a maitabonen ti asawana kasaruno iti covid-19 protocol ken awanen iti mayururay pay a kabagyanda ta saanen a makaumay ti pamiliana idiay Isabela.
Segun ken ni Mendoza, babaen iti social media wenno videocall ket maipakita iti pamilia ni Perlita iti pannakaitabon na.
Impaiman ti OWWA iti dua gasut a ribo a pisos a tulong a maaramat a paggastos iti kasapulan ti pamiliana.
