Agtultuloy a dukduktalen ti Santa Police Station no ania ti motibo ti suspek a nangpaltog iti kalugaranna idiay Sitio San Jose, Barangay Magsaysay District, Santa, Ilocos Sur.
Nabigbig ti biktima a ni Disiderio Balallo, agtawen iti limapulo ket dua, agnaed iti nasao a lugar.
Ti met suspek ket nakasuot iti dark blue sweater, nangisit a sapin ken kallugong.
Iti pannaki-uman ti Bombo Radyo Vigan ken ni Police Captain Rovic Nelmida, Officer-in-charge ti Santa Police Station, napan gimmatang ti suspek iti energy drink ken lima a sigarilyo iti tienda ti biktima a daytoy linakwan ti putot ti biktima.
Nagtugaw apagbiit ti suspek ket idi nakitana ti biktima nga agin-innaw iti lababo ti pagtaenganda, pinaltuganna daytoy iti namitlo a daras.
Nagsagaba iti tama ti paltog ti ulo, akin-kannigid a paset ti bukot ken siket ti biktima, a naideklarar a dead on the spot.
Narekobre dagiti otoridad ti dua a fired cartridge iti nakapasamakan ti pammaltog.
Nakemmeg met ti suspek ken maisagsagana ti kaso a sangwenna.
