Immapela ni National Disaster Risk Reduction and Management Council (NDRRMC) Executive Director ken Office of Civil Defense (OCD) Administrator Usec. Ariel Nepomuceno iti publiko nga agsagana kontra ti pangta iti nakaru a pudot gapu iti panagkapsot ti Northeast Monsoon iti pagilian.
Iti nairuar a memorandum, binilin ti NDRRMC dagiti ahensya ken Local Disaster Risk Reduction Management Councils a siguradoen nga adda umanay a proteksyon ken medical equipment para iti emergency.
Impaganetget pay ni Nepomuceno iti kinapateg ti napaspas a panagsagana gapu iti manamnama a panag-ngato ti heat index manipod iti mid-March agingga agtapos iti Mayo.
Binilin ti NDRRMC amin a Regional Disaster Risk Reduction and Management Councils ken LDRRMC a siguradoen nga umanay ti suplay iti agas ken protective gear tapno maliklikan ti heat exhaustion ken heat stroke.
Nabalakadan iti publiko a limitaran ti panagtalinaed iti ruar, uminom iti adu a danum, liklikan ti tsaa, kape, soft drinks ken arak, agaramat ti payong ken kallugong ken liklikan ti nadadagsen a trabaho iti tengga iti aldaw.
