Nangiruar ti National Bureau of Investigation iti subpoena kontra kadagiti 3 a vlogger a nairaman iti mapapati a panagiwaras iti saan a husto nga impormasion mainaig iti salun-at ni Presidente Ferdinand Marcos Jr.
Segun ken ni Palace Press Officer Atty. Claire Castro, naipasan ti Presidential Communications Office iti NBI dagiti dokumento para iti naun-uneg nga imbestigasion.
Iti agdama, awan pay ti inruar a nayon a detalye ti NBI mainaig iti kaso.
Maipalagip nga idi Abril 15, in-refer ti PCO iti Department of Justice ti posible a panangipila iti kaso kontra kadagiti 3 a Facebook account.
Karaman ditoy ti maysa a live broadcast a nakadakamatan nga adda nakaro a sakit ti Presidente, maysa a post ti manipulated images, ken maysa pay a nangibingay iti mapapati a kumpirmasion iti nakaro a sakitna.
