Mangipila ti nayon a kaso ti National Bureau of Investigation kontra ken ni dati a Bamban, Tarlac Mayor Alice Guo ken dagiti tallopulo ket lima pay nga indibidual mainaig iti mapapati a saan a panagbayad iti buwis ken ilegal a land conversion.
Segun ken ni NBI Director Jaime Santiago, karaman kadagiti mapilaan iti kaso iti Ombudsman dagiti incumbent ken dati nga opisial ti Bamban, Tarlac.
Innayon ni Santiago a P10,000 laeng ti mapapati nga imbayad ni Guo kadua dagiti dadduma pay nga opisial gapu iti iligal a land conversion ti maysa a POGO property iti ili, uray ti P3.9 bilion nga appraised value-na.
Karaman ditoy ti panangipila ti ahensia kadagiti kaso a panaglabsing iti Anti-Graft and Corrupt Practices Act, possession of prohibited interest by a public officer iti salinong ti Revised Penal Code, gross misconduct, serious dishonesty, ken conduct prejudicial to the best interest of the service.
